Luk 24 | WSK | STEP | Ubou tumong biyala imet mu barasaman, mel siring yawara yawara nungurman se aniram mu giman ale Jesus kumik nungurmonko ali motam te namaman.

Luke 24

Jesus barasam

(Mat 28:1-10; Mark 16:1-8; John 20:1-10)

1 Ubou tumong biyala imet mu barasaman, mel siring yawara yawara nungurman se aniram mu giman ale Jesus kumik nungurmonko ali motam te namaman. 2 Ale manga biya mutim kuring te baguman mu gurugu due ko beteman se aniram mu aringiman. 3 Ale nuna kasu naguman, bare Kari Biya Jesus ko kumik guang mutim ningi bagaram se me aringiman. 4 Ale nuna ko nungamin tuguwaman se kari ilagala nunga guang nikinang biya wore aratu nomokete sanamaman.

5 Se imet mu biyala nguangaman ale magi tarakasan. Bare kari ilagala mu nunga manorman, “Nina anape ko kari kuera nunga nuguwim te kari marak bagoso wore ko loagawasan a? 6 Nu ewela me bagoso. Nu maingkala barasam! Nina noko den Galilee baga se ninga maonam wore ko ikia talko. 7 Nu balam, nuna Kari ko Kuriang wore kari memek nuguting te betemon se tam kangono te tagimon se kueruk, ale tom ilagala suwan mu te marak sokel ago barasukko, ma balam, mu ko ikialko.” 8 Se imet den Jesus ulengkala nunga maonam wore nungamin te tairam.

9 Se nuna kuwim mu beteman ale peleman namaman ale olekem 11, se olekem saki agotala, mu mel suen la aratam mu ko dugu duap nunga manorman se ikiman. 10 Imet dugu duap mu apostle alo nunga manarukasan mu nononga ningi bo Maria, nu Magdala imet, se bo Joanna, se bo Maria, James ko nuam. 11 Bare apostle alo imet nunga den balman mu ikiman, bare ko nongomang ningi me nunguning akaso. Nuna balukasan mu yam den daula makasan.

12 Bare Peter barasam ale mutim ningi loagurukko nagu nagu namaram. Ale tararam ningi loagaram, bare guang Jesus te kaloman mu la aniram se arigam. Ale peleram kawam te namaram ale mel aratam mu ko kuamin tugu se bagakaso.

Kari ilagala Emmaus namawa Jesus aringiman

(Mark 16:12-13)

13 Tom suwanta nukung te la olekem ilagala aolak iluman wonong bo nup Emmaus mu te namakasan. Lage Jerusalem nama Emmaus mu 11 kilometre iwita. 14 Nuna aolak iluman nama se, mel suen biya aratam wore ko duap balu gurugu gurugu namawakasan. 15 Nuna uwutata balu se namangaman se Jesus kota aolak iluwam tai nongote, se arungak namakaso. 16 Se nuna aringiman bare me noko sinar uriakasan.

17 Se nu nunga isuam, “Nina aolak ilu se anape balu lagasan a?” mam.

Se nuna pila sanamaman nongomang batagakaso se nomoke ma niara karogo iwita. 18 Se bo, ko nup Cleopas, mu den koma nu maonam, “Wonong sor suen biya ko kariimet Passover tom biya ko Jerusalem namaman bagakasan, se am ni keta mu mel ulengko aratam mu ni me arigem ale me ko ikiem agila pa?”

19 Se nu nunga isuam, “Se anape mel a?” mam.

Se ilagala nu manorman, “Mu Jesus Nazareth ko wore mel nu kumik te aratam wore. Nu prophet. Nu Kaem koma te se kariimet nomokete ura sokel ago bitakaso, ale den sokel ago balukaso. 20 Bare priest bibiya se anananga kari supuling alo nu iluman, ale Rome kari supuling kuting te beteman, nu baluk se tam kangono te tagimon se kuerukko balman ale nu tuman. Se butata bita gilingiman se kueram. 21 Anananga ikia te balukasan mu kari imitang Israel nunga sangaru taukko baluwaman wore moman se kueram makasan.

“Bare mu la mena. Mel mu aratam tom ilagala namaram, se aitak tom suwan bo imi te 22 mel bo tala aking aratam, se ana ko biririkiman ale ko nangamin tuguwasan. Ana olekem nanga ningi imet saki tumong biyala barasaman ale ali motam te namaman, 23 bare Jesus ko kumik guang mutim gogong mu ningi aniram se me aringiman! Ale peleman taiman ale iwita nanga manorman, nuna namaman engel ilagala nungarkaman, se engel balman Jesus marak sokel ago barasam ma balman, wore taiman nanga manorman. 24 Se ana ningi kari sikina mutim te namaman mu mel imet balman butatala mu aringiman. Bare Jesus mu me aringiman.”

25 Se Jesus nunga maonam, “Nina ikia sinar mena agila pa!” mam. “Nina prophet nunga den suen la balman wore ko nengemang ningi me nunguning aram! 26 Nuna wetang te tala balman, Kristus girok ikup yaman imi giok bare asele, nu nup biya taukkowo maman.” 27 Jesus uwuta balam asele nu nunga kausa duap beteram, ale noko duap aguwaya batoga te aniso wore ko nunga maonam, ale ko nunguning nunga kasurukaso. Nu giram Moses ko batoga te duap beteram balukaso, ale eng prophet suen la nunga batoga mu balukaso. ^{▼▼Luke 24:25-27 Kristus ikup yaman giokko den: Psa 22:1-21; Isa 53.}

28 Nuna aolak iluman nama wonong te ZZZ namangaman mu te pingi awaman, bare Jesus am aolak ilu namurukko numi to tuikaso, 29 se nuna manorman, “Ni am nangarak bagerko!” maman. “Worem kaparam sor turom batagam.” Buta balman se nu eng arungak namaram kawam ningi kasu naguram.

30 Nuna na namonko, se Jesus arungak daigam ale bread tam ale Kaem aru maonam, ale pakokaram nungaru gurugam. 31 Nu uwutata beteram mu te nuna ko iki gilingiman. Se nu eng nomotam ningi mena namaram.

32 Se ilagala nunumi manarukasan, “Ana aolak iluman taikasan se nu prophet nunga batoga ko duap nanga manarukaso se ikikasan ale ana den mu ko nangamang ninguru barasam!” makasan. 33 Mu te nuna barasaman ale peleman Jerusalem namakasan, olekem 11 mu nunga saki arungu umu te kuwim taman ago bagaman mu nongote namaman.

Se olekem mu kari ilagala nunga manorman, 34 “Kari Biya nunguningta barasam! Nu Simon-Peter kote aratam se arigam,” maman.

35 Se nuna ilagala mel suen biya lage te nuna nomokete aratam mu ko dugu duap nunga manorman. Ale balman, “Nu bread kulukuam mu te ana noko ikiman,” maman.

Jesus ko olekem alo nongote aratam se aringiman

(Mat 28:16-20; Mark 16:14-18; John 20:19-23)

36 Nuna den mu baluwaman se Jesus nunga kusumuri aratu sanamaram ale balam, “Nengemang lila te bagaralko,” mam. 37 Se nuna aringiman tengeman, ale kari kuera bo ko dora ko balman, ale ninguru nguangakasan.

38 Bare Jesus nunga maonam, “Nina anape ko nguangasan? Nina anape ko ningamin yeneso ya? 39 Aninga agiting asiwik arigalko, imi anigita! Nigiting aninga angimik te beteral ale aga ilu arigalko. Aninga angimik guang nunguning asokel ago, ani kari kuera ko dora iwita angimik guang asokel mena iwita mena.”

40 Nu uwutata balam, ale ko suwik kuting nil kuruwim karogo mu te nunga kausam se aringiman. 41 Ale ko amilmilaman, bare yam ko nungamin yenakaso. Se nu nunga isuam, “Nina ninga na mel i ewela ago?” 42 Se nuna wal kaiya mu ko sang tuman, 43 se tam ale nomokete nam se aringiman.

44 Se nu nunga maonam, “Tom ani nengerak baga se ani ninga manem, mu mel borta aratam. Den suen biya girakala aninga angimik ko Moses ko batoga te, se prophet nunga batoga te, se Psalm te, mu ko nunguning e ta aratam ta imitang.”

45 Se nu nunga ikia sinar uwiram, nuna te Kaem ko batoga ko ikimonko. 46 Nu nunga maonam, “Batoga te iwita aniso: Kristus yaman tauk ale kueruk ale tom ilagala suwan mu te barasukko. 47 Mu te ko olekem alo Jerusalem ningi duap betemon, ale noko nup te sor suen biya te geragomon ale kariimet iwita nunga manarmonko, ‘Nina giris palagal se Kaem nenenga ikup siwu sapurukko,’ ma balmonko.

48 “Buta se nina butata beteralko. Mu awuk, nina mel suen la aratam imi mu nemetam te aringiman ko ikiman. 49 Bare aninga Ait mel bo ningarukko balam, mu ani kote namirik asele nu bitirik se nengete tai kapurukko. Buta se nina Jerusalem kimi bita se bagaral, se duruk ko sokel mu tairuk ale ningimik ago terong mauk asele namaral den gilalong yawara apuralko.” ^{▼▼Luke 24:49 Korang Bur tai kapurukko: John 15:26; 16:7; Acts 1:4.}

Jesus duruk wonong te peleram namaram

(Mark 16:19-20; Acts 1:9-12)

50 Se Jesus arungak Bethany namaram. Asele nu kuting patowaram ale marak nungaram. 51 Nu marak nungaru se eng barasam nunga beteram ale duruk wonong te nama tarigiram. 52 Se nuna nup patowaman, ale nongomang ningi amilmil biyala ago peleman Jerusalem namaman. Ale tom suen biya temple ningi Kaem nup patawu se bagakasan.

53